ՀՀ երկրորդ նախագահ Ռոբերտ Քոչարյանը կարծում է, որ վարչապետ Նիկոլ Փաշինյանի «Մարտի 1-ի» մասին անընդհատ խոսելու իր պարբերական հայտարարությունները պայմանավորված են ֆոբիայով։
Քվեարկությունից հետո լրագրողների հետ զրույցում Ռոբերտ Քոչարյանը նշեց, որ վարչապետը այդպիսով փորձում է «սրբագրել» 2020 թվականի պատերազմի հետևանքով եղած հազարավոր զոհերն ու հսկայական կորուստները։
««Մարտի 1-ի» մասին շատ է խոսում մեկ պատճառով․ իրեն թվում է, թե «Մարտի 1»-ով ինքը սրբագրում է այս 5000 զոհերն ու հսկայական կորուստները։ Այդ մարդու ֆոբիաների դրսևորումն է»,- ասաց նա՝ հավելելով, որ ինչ վերաբերում է իր՝ «Մարտի 1-ի» գործով նստելուն, ապա ինքն ապօրինաբար է նստել, արդարացվել է, և հիմա ժամանակն է օրինական ձևով Նիկոլ Փաշինյանի համար շատ-շատ երկար նստելու։
Հիշեցնենք, որ 2008 թվականի փետրվարի 24-ին Հայաստանի ԿԸՀ-ն հայտարարել էր Սերժ Սարգսյանի հաղթանակի մասին։ Բողոքի ակցիայի մասնակիցները պահանջում էին վերահաշվարկել քվեները։ Մարտի 1-ի գիշերը ոստիկանական ուժերը ցրեցին Ազատության հրապարակում հավաքված հազարավոր ցուցարարներին։ Մարտի 1-ի երեկոյան Երևանի կենտրոնական փողոցներում զենքի, պայթուցիկ սարքերի և հատուկ միջոցների օգնությամբ ցուցարարներին ցրելու համար հատուկ գործողություններ էին իրականացվել։ Այդ իրադարձությունների հետևանքով զոհվել էին 8 քաղաքացիական անձ և 2 ոստիկան։
